मेलबर्नमा पत्रकार महासंघकी अध्यक्ष निर्मला शर्मालाई सम्मान 

 मेलबर्न । नेपाल पत्रकार महासंघकी अध्यक्ष निर्मला शर्मालाई अष्ट्रेलियाको मेलबर्नमा सम्मान गरिएको छ । अष्ट्रेलियन नेप्लीज जर्नलिष्ट एशोसिएसन (एन्जा) को आयोजनामा ३० अक्टोबर शुक्रबार  भिक्टोरियाका विभिन्न सामाजिक संघसंस्थाको सहकार्यमा आयोजित कार्यक्रममा शर्मालाई सम्मान गरिएको हो ।

कार्यक्रममा नेपालको प्रेस स्वतन्त्रता, पत्रकारिताको अवस्था र प्रवासमा रहेका नेपालीका मुद्दाबारे अन्तरक्रियासमेत गरिएको थियो ।

दिदीबहिनी वुमन्स नेटवर्ककी मिडिया संयोजक आश्मा चालिसेले शर्माको नेतृत्व र लैंगिक समानताका क्षेत्रमा पुर्‍याएको योगदानको प्रशंसा गर्दै उनको सफलता नेपाली महिलाका लागि प्रेरणादायी रहेको बताइन् ।

नेपाली एसोसिएसन अफ भिक्टोरियाकी उपाध्यक्ष सरोजा श्रेष्ठले प्रवासी नेपालीका समस्या र मुद्दालाई सम्बोधन गर्न नेपाली सञ्चारमाध्यमले पुलको भूमिका निर्वाह गर्नुपर्ने धारणा राखिन् । अष्ट्रेलियन नेप्लीज मल्टिकल्चरल सेन्टरका सचिव सुधीर शाक्यले प्रविधिमा आएको परिवर्तनसँगै पत्रकारिताले पनि आफूलाई समयानुकूल बनाउनुपर्ने बताए ।

भिक्टोरियाका लागि नेपालका पूर्वअवैतनिक वाणिज्यदूत निराजन गौलीले सामाजिक सञ्जालमा फैलिने भ्रामक सामग्री नियन्त्रणका लागि प्रभावकारी कानुनी व्यवस्था आवश्यक रहेको बताए । एन्जाका संरक्षक चिरञ्जीवी देवकोटाले नेपाली पत्रकारिता राजनीतिक प्रभावबाट मुक्त हुनुपर्ने र महासंघले संस्थागत शुद्धीकरणलाई प्राथमिकता दिनुपर्ने धारणा राखे ।

कार्यक्रममा बोल्दै अध्यक्ष शर्माले नेपालमा प्रेस स्वतन्त्रताको संवैधानिक व्यवस्था बलियो भए पनि सरकारी गतिविधिका कारण चुनौती कायमै रहेको बताइन् । प्रवासमा पाएको सम्मानले थप जिम्मेवारीबोध गराएको उल्लेख गर्दै उनले प्रवासी नेपालीका मुद्दामा सहकार्य गर्ने प्रतिबद्धता जनाइन् ।

निजी भ्रमणका लागि अष्ट्रेलिया आएकी शर्मा पहिलोपटक मेलबर्न पुगेकी हुन् । कार्यक्रममा सञ्चारकर्मी, सामाजिक अगुवा तथा विभिन्न संघसंस्थाका प्रतिनिधिको सहभागिता थियो ।