गायक रमण रेग्मीले ल्याए  ‘बिछोडको घाउ' 

सिड्नी । बिगत दुई दशकदेखि अष्ट्रेलियालाई कर्मथलो बनाउदै आएका गायक रमण रेग्मीले हालै नयाँ म्युजिक भिडियो मार्फत् ‘बिछोडको घाउ’ गीत बजारमा ल्याएका छन् । प्रेम, प्राप्ति र बिछोडको कथा प्रस्तुत गरिएको यो म्युजिक भिडियोको निर्देशन केशवराज भट्टले गरेका छन् ।  प्रेममा बिछोडको भाव बोकेको यो गीतमा रमणकै शब्द र किरण कँडेलको संगीत तथा एरेन्ज छ । 

 भिडियोमा केशवराज भट्ट, शिल्पा पोखरेल र अर्जुन खड्का फिचर्ड छन् ।  भिडियोमा त्रिकोणत्मक प्रेम कथा र प्रेम वियोगको भावलाई देखाइएको छ। जहाँ आँफुलाई भन्दा बढी माया गरेका प्रेमीलाई धोका दिएर शिल्पाले एक धनाड्य प्रेमी रोजेको कथालाई देखाइएको छ । केशवराजकै कोरियोग्राफी रहेको भिडियोको छायांकन विशाल थापा र नरेश ऐरको गरेका हुन् भने कलर संयोजन तथा सम्पादन राकेश दाहालले गरेका हुन् ।

म्युजिक भिडियोको यो गीत ‘ रमण रेग्मी’ युट्युब च्यानलमा सार्वजनिक गरिएको छ । गायक रेग्मीले यसअघि घर त लगन खेलको रिमेक भर्सन, मुखै चिलाउनी , खुला जमिन, मेसो पा छैन, हामी जनतालाई धेरै गाह्रो छ, नेपालै जाउँ जाउँ लाग्छ,लगायत गीत ल्याइसकेका छन् ।

आफ्नो गायन यात्राका बारेमा नेपाल न्युजसंग कुरागर्दै गायक रमण रेग्मीले  आफु सुगम संगीत बाट नेपाली सांगेतिक क्षेत्रमा आएको र यसै क्षेत्रमा रहेर आफ्ना गीत संगीत पस्कने छु । उनले भने - आफ्नो साँगेतिक यात्राको निरन्तरताको प्रतिफल नै ‘बिछोडको घाउ’ हो । यो एउटा सुन्न मिल्ने गीत हो , जुन गीत लेख्दा अनि गाउदा मलाई बेग्लै किसिमको आनन्द र  सन्तुस्टी मिलेको छ ।