डब्बोकी आन्या सुमन कोइरालालाई NSW Young Volunteer of the Year सम्मान

डब्बो, अस्ट्रेलिया ।  नेपाली समुदायकी युवा आन्या सुमन कोइराला NSW Young Volunteer of the Year – Orana 2026 की विजेता बनेकी छन्। समुदायप्रतिको निरन्तर सेवा, स्वयंसेवा तथा नेपाली भाषा, कला र संस्कृतिको प्रवर्द्धनमा पुर्‍याएको योगदानका लागि उनलाई उक्त प्रतिष्ठित सम्मान प्रदान गरिएको हो।

सानै उमेरदेखि समुदायका गतिविधिमा सक्रिय आन्याले स्वयंसेवालाई आफ्नो जिम्मेवारीका रूपमा अघि बढाउँदै आएकी छन्। स्वयंसेवा गर्दा समय, मौसम वा व्यक्तिगत सुविधाभन्दा पनि समुदायलाई के योगदान दिन सकिन्छ भन्ने विषयलाई उनले प्राथमिकता दिँदै आएकी छन्।

आन्याले नेपाली भाषा विद्यालयमा शिक्षकहरूलाई सहयोग गर्नुका साथै साना बालबालिकालाई मार्गदर्शन गर्ने र विभिन्न सामुदायिक गतिविधिमा सक्रिय सहभागिता जनाउँदै आएकी छन्। नेपाली भाषा र संस्कृतिप्रति नयाँ पुस्तामा रुचि जगाउने कार्यमा समेत उनको निरन्तर सक्रियता रहँदै आएको छ।

नेपाली कला र संस्कृतिको प्रवर्द्धनमा पनि उनको भूमिका उल्लेखनीय छ। नेपाली गीतमा नृत्य प्रस्तुत गर्दै उनले विभिन्न कार्यक्रम तथा सांस्कृतिक महोत्सवमा नेपालको संस्कृति चिनाउँदै आएकी छन्। न्यू साउथ वेल्सका विभिन्न सामुदायिक कार्यक्रममा नेपाल र नेपाली समुदायको प्रतिनिधित्व गर्न उनी अग्रसर हुँदै आएकी छन्।

आन्याको स्वयंसेवी यात्राको विशेष पक्ष भनेको सम्मान वा पुरस्कारको अपेक्षाभन्दा सेवाको भावनालाई प्राथमिकता दिनु हो। अरूलाई सहयोग गर्ने, समुदायलाई केही योगदान गर्ने र आफ्नो तर्फबाट सकारात्मक परिवर्तन ल्याउने उद्देश्यले उनी विभिन्न सामाजिक तथा सांस्कृतिक गतिविधिमा जोडिँदै आएकी छन्।

उनको यही निरन्तरता, समर्पण र निस्वार्थ सेवाको कदरस्वरूप प्राप्त यो सम्मानले परिवारमा पनि खुसी थपेको छ। आन्याका अभिभावकका लागि यो उपलब्धि पारिवारिक गर्वको विषय मात्र नभई अस्ट्रेलियामा रहेका नेपाली समुदायका लागि समेत गौरवको क्षण बनेको छ।

हाल न्यू साउथ वेल्सको डब्बोमा बसोबास गर्दै आएकी आन्याको उपलब्धिले स्वयंसेवाका लागि उमेर वा पदभन्दा इच्छाशक्ति र सेवाभाव महत्वपूर्ण हुने सन्देश दिएको छ। समुदायका लागि गरिने साना प्रयासले पनि सकारात्मक परिवर्तन ल्याउन सकिन्छ भन्ने उदाहरण उनको यात्राले प्रस्तुत गरेको छ।

अस्ट्रेलियाको बहुसांस्कृतिक समाजमा नेपाली भाषा, कला, संस्कृति र पहिचानलाई चिनाउन सक्रिय आन्याले प्राप्त गरेको यो सम्मानले नयाँ पुस्तालाई पनि स्वयंसेवा तथा समुदायप्रति जिम्मेवार बन्न प्रेरित गर्ने अपेक्षा गरिएको छ।