अस्ट्रेलियामा तीजको अवसरमा बाढीपीडितलाई सहयोगः ‘रातो घर’ को कुल बिक्रीको २५ प्रतिशत नेपाल पठाइने

सिड्नी। नेपालमा हालै आएको विनाशकारी बाढीका कारण उत्पन्न विषम परिस्थितिप्रति विदेशमा रहेका नेपालीहरूले गहिरो दुःख व्यक्त गर्दै सहयोगको हात अगाडि बढाएका छन्। यसैक्रममा अस्ट्रेलियाको सिड्नीस्थित ग्यान्भिलमा रहेको नेपाली रेस्टुरेन्ट ‘रातो घर’ (Raato Ghar) ले नेपालीहरूको पर्व तीजको अवसरमा आयोजित ‘तीजको रमझम नाइट’ मार्फत बाढीपीडितलाई आर्थिक सहयोग गर्ने विशेष घोषणा गरेको छ।
आयोजकका अनुसार कार्यक्रमको कुल बिक्रीको २५ प्रतिशत रकम तथा आगामी चार हप्ताको कुल बिक्रीबाट प्राप्त हुने रकममध्ये २५ प्रतिशत सिधै नेपालका बाढीपीडितको राहत तथा पुनर्स्थापनाका लागि प्रदान गरिने जनाएको छ । यही  शुक्रबार, ११ सेप्टेम्बर २०२६ मा ग्रानभिलस्थित १२ गुड स्ट्रिटमा रहेको रातो घरमा  साँझ ७:३० बजेदेखि रातको २:० बजेसम्म विशेष सांगीतिक कार्यक्रम आयोजना हुँदैछ।
कार्यक्रममा चर्चित लोक गायक पुरुषोत्तम न्यौपाने  मन्जु पौडेल लगायतका कलाकारहरूको विशेष प्रस्तुति रहनेछ। 

लोकप्रिय लोक गायक पुरुषोत्तम न्यौपानेले देशमा परेको यो कठिन समयमा प्रवासमा रहेका नेपालीहरू एकजुट हुनु सराहनीय रहेको बताएका छन्। न्यौपानेले भने, "नेपालमा प्राकृतिक विपत्तिका कारण हाम्रा दाजुभाइ तथा दिदीबहिनीहरू अत्यन्तै कष्टकर जीवन बिताउन बाध्य हुनुहुन्छ। यस्तो दुःखी र कठिन समयमा तीज मनाइरहँदा हामीले आफ्नो खुसी मात्र नहेरी उहाँहरूको घाउमा मलम लगाउनुपर्छ। गीत-संगीतको माध्यमबाट संस्कृति जोगाउँदै मातृभूमिको दुःखमा सारथी बन्न पाउनु मेरो लागि ठूलो कुरा हो। उनले सबैलाई यो परोपकारी अभियानमा जोडिन अपिल गरेका  छन् ।  

रातो घरका सञ्चालक गगन शर्माले सामाजिक उत्तरदायित्व बोध गर्दै यो सानो प्रयास गरिएको बताए। शर्माले भने, "हामी अस्ट्रेलियामा भए पनि हाम्रो मन र धड्कन सधैँ नेपालमै हुन्छ। देशमा बाढीपहिरोले ठूलो क्षति पुर्‍याएको खबरले हामीलाई निकै मर्माहत बनाएको छ। केवल पर्व मनाउनु मात्र हाम्रो उद्देश्य होइन; चाडपर्वको खुसीसँगै दुःखमा परेका नेपाली दाजुभाइलाई सहयोग गर्नु हाम्रो कर्तव्य हो। त्यसैले हामीले ४ हप्ताको कुल बिक्रीको २५ प्रतिशत रकम नेपाल राहत कोषमा पठाउने निर्णय गरेका हौँ।"

यस कार्यक्रममा सहभागी भई बाढीपीडितको सहयोगमा हात मिलाउन आयोजकले अस्ट्रेलियाबासी नेपाली समुदायलाई हार्दिक निमन्त्रणा गरेका छन्।यस अभियानमा ग्रानभिल नेपाली कम्युनिटी क्लबले समेत सहकार्य तथा सहयोग गरेको आयोजकले जनाएको छ।