बाढीपीडितको सहयोगार्थ अस्ट्रेलियामा ‘अबर्न तीज धमाका’

सिड्नी। नेपालमा हालै  आएको  बाढीबाट प्रभावित परिवारको राहतका लागि अस्ट्रेलियामा क्रियाशील 'अबर्न नेपाली कम्युनिटी' (एएनसी) ले विशेष च्यारिटी कार्यक्रम गर्ने भएको छ।
संस्थाले यही सेप्टेम्बर ११ तारिख शुक्रबारका दिन सिड्नीको अबर्नस्थित 'द ग्रान्ड प्यालेस फन्क्सन सेन्टर' मा ‘अबर्न तीज धमाका भोल्युम ५’ आयोजना गर्न लागेको हो। "नारीको सम्मान, हाम्रो पहिचान" भन्ने मूल नाराका साथ आयोजना हुन लागेको उक्त कार्यक्रमलाई यसपटक परोपकारी कार्य (च्यारिटी) सँग जोडिएको छ।

यसपालिको तीज धमाकामा दर्शकहरूलाई सांगीतिक मनोरञ्जन दिन नेपालका चर्चित कलाकारहरू एलिना चौहान, अर्जुन सापकोटा र मोडल/नृत्याङ्गना अञ्जली अधिकारीको बेजोड प्रस्तुति रहनेछ। कार्यक्रममा सहभागी हुनका लागि अनलाइन टिकटको मूल्य ५५ अस्ट्रेलियाली डलर (३-कोर्स मिल र सफ्ट ड्रिंक्ससहित) तोकिएको छ।
आयोजकका अनुसार कार्यक्रमका लागि बिक्री हुने प्रत्येक टिकटको निश्चित रकम नेपालस्थित प्रधानमन्त्री दैवी प्रकोप उद्धार कोषमा पठाइने व्यवस्था मिलाइएको छ।
नेपालमा गएको दुखद् प्राकृतिक विपत्तिबारे चिन्ता व्यक्त गर्दै अबर्न नेपाली कम्युनिटीका अध्यक्ष अरुण श्रेष्ठले भने, "अहिले हाम्रो जन्मभूमि नेपाल बाढीबाट  निकै कठिन मोडबाट गुजरिरहेको छ। यस्तो विपत्तिको समयमा प्रवासमा रहेका हामी नेपालीको कर्तव्य रमाइलोसँगै पीडामा परेका नेपाली दाजुभाइ तथा दिदीबहिनीलाई मद्दतको हात बढाउनु पनि हो।"
अध्यक्ष श्रेष्ठले अगाडि थपे, "हामीले बिक्री गर्ने प्रत्येक टिकटको रकमले नेपालका बाढीपीडितको मद्दतमा प्रत्यक्ष योगदान पुग्नेछ।सांस्कृतिक प्रवर्द्धनका साथै सामाजिक दायित्व पूरा गर्ने उद्देश्यले आयोजित उक्त कार्यक्रम शुक्रबार अपराह्न ४ बजेदेखि सुरु हुने आयोजक समितिले जनाएको छ।
 अध्यक्ष श्रेष्ठले सम्पूर्ण अस्ट्रेलियावासी नेपाली समुदायलाई यो पवित्र कार्यमा सहभागी भई सहयोग गरिदिनुहुन हार्दिक अपिल समेत  गरेका छन्  ।