बाढी-पहिरो पीडितका लागि प्रवासी नेपाली मञ्चद्वारा २० लाख रुपैयाँ सहयोगको घोषणा

सिड्नी।  रसुवा, नुवाकोट र धादिङलगायतका क्षेत्रमा हालै आएको विनाशकारी बाढी तथा पहिरोबाट प्रभावित भएका नागरिकको उद्धार र राहतका लागि प्रवासी नेपाली मञ्च (ओएनएफ) अन्तर्राष्ट्रिय कमिटीले तत्काल २० लाख रुपैयाँ सहयोग उपलब्ध गराउने निर्णय गरेको छ।
मञ्चको सचिवालय बैठकले अन्तर्राष्ट्रिय कमिटीको केन्द्रीय कोषबाट उक्त रकम आपत्कालीन राहत कार्यका लागि परिचालन गर्ने निर्णय गरेको हो। मञ्चका अध्यक्ष रमेश पाण्डेका अनुसार राहत रकमलाई प्रभावित क्षेत्रका नागरिकको आवश्यकताका आधारमा पारदर्शी, न्यायोचित र प्रभावकारी ढंगले वितरण गरिनेछ। यसका लागि मञ्चले सम्बन्धित सरकारी निकाय तथा स्थानीय संयन्त्रहरूसँग आवश्यक समन्वय गरी वितरण प्रक्रिया अघि बढाउने जनाएको छ।

प्रभावित क्षेत्रमा राहत तथा पुनस्थापनाको कामलाई थप तीव्र बनाउन मञ्चले ‘नेपाल बाढी तथा पहिरो पीडित राहत सहयोग अभियान’ विश्वव्यापी रूपमा सञ्चालन गर्ने निर्णय समेत गरेको छ। यस अभियानमार्फत विश्वभर छरिएर रहेका मञ्चका महादेशीय तथा राष्ट्रिय कमिटीहरू, नेपाली उद्यमी-व्यवसायी, सामाजिक संघ-संस्था र आम गैरआवासीय नेपालीहरूलाई ऐक्यबद्धता जनाउँदै आर्थिक सहयोग संकलनमा जुट्न मञ्चले हार्दिक अपिल गरेको छ।
मञ्चले यसअघि पनि मुलुकमा परेका विभिन्न विपद्का समयमा महत्त्वपूर्ण योगदान पुर्‍याउँदै आएको छ। मञ्चले कोभिड-१९ महामारीका बेला पोखरास्थित गण्डकी अस्पतालमा ३ करोड रुपैयाँको लागतमा अक्सिजन प्लान्ट स्थापना गरेको थियो भने जाजरकोट भूकम्प प्रभावित क्षेत्रमा १ करोड रुपैयाँको लागतमा स्वास्थ्य चौकी निर्माण गरी हस्तान्तरण गरिसकेको छ।