NRNA नारी निकुञ्ज वुमन फोरम अष्ट्रेलियाको आर्थिक सहयोगमा पाठेघरको मुखको क्यान्सर परीक्षण तथा परामर्श शिविर सम्पन्न

सिड्नी । सुन्दर कर्णाली संस्थाको आयोजनामा, NRNA नारी निकुञ्ज वुमन फोरम अष्ट्रेलियाको आर्थिक सहयोग तथा गुर्भाकोट नगरपालिका र मेहेलकुना अस्पतालको समन्वयमा हिजो शनिबार  मेहेलकुना अस्पतालमा पाठेघरको मुखको क्यान्सरसम्बन्धी निःशुल्क स्वास्थ्य परीक्षण, उपचार र परामर्श शिविर सफलतापूर्वक सम्पन्न गरिएको छ।

शिविरमा ३० वर्ष माथिका महिलाको पाठेघरको मुखको क्यान्सर, अङ्ग खस्ने समस्या लगायतका स्वास्थ्य परीक्षण गरिएको थियो। कुल २५५ महिलाले सेवा लिएका मध्ये २० जनामा VIA पोजिटिभ देखिएको छ भने जटिल समस्या भएका केहीलाई थप उपचारका लागि प्रदेश अस्पताल सुर्खेतमा रिफर गरिएको छ। साथै, ५ जना महिलामा रिङ पेसरी राखिएको, अन्यलाई निःशुल्क औषधि वितरण गरिएको तथा स्त्रीरोग विशेषज्ञद्वारा परामर्श प्रदान गरिएको थियो।

यस अवसरमा NRNA नारी निकुञ्ज अष्ट्रेलियाकी संयोजक संगिता चापागाईँले भनिन् - महिलाहरुमा देखिने पाठेघरको मुखको क्यान्सर गम्भीर स्वास्थ्य समस्या हो, तर नियमित परीक्षण र समयमै उपचारले यसलाई नियन्त्रण गर्न सकिन्छ। प्रवासमा रहेर पनि मातृभूमिका दिदीबहिनीको स्वास्थ्य सुरक्षामा योगदान गर्न पाउँदा गौरवान्वित  भएको बताइन्  ।  आगामी दिनमा पनि यस्ता स्वास्थ्यमूलक कार्यक्रमलाई निरन्तरता दिने प्रतिबद्दता ब्यक्त गरिन्  ।  

शिविरको उद्घाटन गुर्भाकोट नगरपालिका प्रमुख श्री हस्त पुनज्यूको प्रमुख आतिथ्यतामा सम्पन्न उक्त कार्यक्रममा प्रदेश अस्पताल सुर्खेतका पूर्व मेसु प्रा. डा. डम्बर खड्का, गुर्भाकोट नगरपालिकाकी उप–प्रमुख मैना बिकसहित अन्य विशिष्ट अतिथिहरूको उपस्थिति रहेको थियो।

यस सफल आयोजनामा अमूल्य सहयोग पु¥याउनु भएकोमा  NRNA नारी निकुञ्ज वुमन फोरम अष्ट्रेलियाको टिमप्रति विशेष धन्यवाद ज्ञापन गरेको  छ। त्यस्तै, सक्रिय समन्वयका लागि गुर्भाकोट नगरपालिका परिवार, मेहेलकुना अस्पताल परिवार, कार्यक्रम ल्याउन पहल गर्नुहुने प्रा. डा. डम्बर खड्का, स्त्रीरोग विशेषज्ञ डा. ललितजंग शाही, बराहताल गाउँपालिकाकी नर्सिङ प्रमुख विष्णु गुरुङ, स्वास्थ्यकर्मी, स्थानीय दिदीबहिनी तथा प्रत्यक्ष–अप्रत्यक्ष रूपमा सहयोग पुर्याउनु हुने सम्पूर्ण सहयोगीहरुप्रति हार्दिक कृतज्ञता व्यक्त गरेको  छ।