सिड्नी आध्यात्मिक महोत्सवको दोस्रो दिन : करिब ४ लाख डलर संकलन

सिड्नी ।सिड्नीमा जारी सिड्नी आध्यात्मिक महोत्सवको दोस्रो दिन शनिबार करिब चार लाख अष्ट्रेलियन डलर संकलन भएको छ।

शनिबार बिहान पण्डित राजन शर्माद्वारा योग सत्र सञ्चालन गरिएको थियो। त्यसपछि पण्डित दीन बन्धु पोख्रेलको भागवत वाचन, विभिन्न सामुदायिक संघ–संस्थाका प्रस्तुति, दान ग्रहण तथा आजीवन सदस्यता वितरणसहित दिनभरका कार्यक्रम सम्पन्न भए।
यस दिन संकलित रकममध्ये सबैभन्दा ठूलो सहयोग न्यु साउथ वेल्सका अवैतनिक नेपाली वाणिज्यदूत सन्जिव शर्मा र शर्मिला लुइँटेल तथा एक्स्पर्ट एजुकेशन एण्ड भिसा सर्भिस का निर्देशक बद्रि अर्याल र सम्झना अर्यालबाट प्राप्त भएको हो। उनीहरूले संयुक्त रूपमा २ लाख १ हजार डलर योगदान गरेका छन्।
त्यसैगरी राज–लक्ष्मी खनालबाट १ लाख ५०१ डलर, मेघराज–किशोरी पौडेलबाट २५ हजार १ डलर, शिव–पवित्रा बन्जारा अर्यालबाट ११ हजार १११ डलर, टुंगनाथ–चन्द्रकला खरेलबाट १० हजार १०१ डलर, सुमित्रा–रामजी विष्टबाट १० हजार १ डलर र सन्तोष–इन्दिरा फुयाल बास्तोलाबाट १० हजार ५५१ डलर सहयोग गरिएको छ। साथै एनआरएनए अष्ट्रेलिया अध्यक्ष अनिल पोखरेल–अनिता पाठक, रत्नबहादुर–अञ्जु थापा तथा सूर्यप्रसाद गौतम–सुष्मा खनालले पनि १० हजार डलरभन्दा बढी रकम सहयोग गरेका छन्।

शनिबारकै दिन नेपाली कला संस्कृति तथा साहित्य प्रतिष्ठान र गोरखा समाज अष्ट्रेलियाले संस्थागत सदस्यता लिएका छन्। साथै एकैदिन १११ जनाले आजीवन सदस्यता ग्रहण गरेका छन्, जुन अहिलेसम्मकै उच्च दैनिक संख्या हो। कार्यक्रम स्थलमा राखिएको दान पेटिकाबाट २,९७० डलर नगद पनि संकलन भएको आयोजकले जनाएको छ।
महोत्सवको पहिलो दिन शुक्रबार पनि सहभागीहरूले करिब चार लाख डलर बराबरको सहयोग गर्ने प्रतिबद्धता जनाएका थिए।
आज आइतबार महोत्सवको तेस्रो तथा समापन दिन विविध धार्मिक, सांस्कृतिक र सामुदायिक कार्यक्रमहरू आयोजना हुँदैछ। आयोजक GSNMC ले सिड्नीमा रहेका सम्पूर्ण नेपाली समुदायलाई सहभागी भई महोत्सवलाई अझै सफल बनाउन विशेष आह्वान गरेको छ।