मेलबर्नको ग्लेनरोयमा वाणिज्यदूतको नयाँ कार्यालय उद्घाटन

सिड्नी । मेलबर्नको ग्लेनरोयमा भिक्टोरियाका लागि नेपाली अवैतनिक वाणिज्यदूतको नयाँ कार्यालय उद्घघाटन  भएको छ । यहि मार्च १६ तारिक आइतवारका दिन एक विशेष कार्यक्रमको आयोजना गरी अष्ट्रेलियाका लागि नेपाली राजदूत चित्रलेखा यादवले उक्त कार्यालयको उद्घाटन गरेकी  हुन् । राजदूत यादवले रिबन काटेर कार्यालयको उद्घाटन गरिन् । साथै राजदूत यादव र भिक्टोरियाकी सांसद क्याथलिन म्याथ्यूले एकसाथ नेपाल र अष्ट्रेलियाको झण्डोत्तोलन गरेर नयाँ कार्यालयका शुभारम्भ गरे । राजदूत यादवले भिक्टोरियावासीको सेवालाई अझ बढी चुस्त र  प्रभावकारी बनाउन दुताबासमा निहित केही अधिकारहरुलाई विकेन्द्रिकरण गर्न आफुले पहल गर्ने बताइन् । 

भिक्टोरियाका नेपालीहरुको बाक्लो बसोबास रहेको ग्लेनरोय क्षेत्रमा नयाँ वाणिज्यदूतको कार्यालय खोलिएपछि कार्यालयको काम अझ बढी चूस्त र सहज हुने विश्वास गरिएको छ । उद्घाटनको अवसरमा वाणिज्यदुत निराजन गौलीले उपस्थित अतिथिहरुलाई स्वागत गर्दै जन चासोका समस्याहरुलाई अझ बढी प्रभावकारी ढंगबाट सेवा दिने प्रतिवद्धता जाहेर गरे ।  उनले नेपाल न्युुज अष्टे्रलियासंगको कुराकानीमा भिक्टोरियाबासीहरुले पासपोर्ट नविकरणको लागि वाणिज्यदुतकोकार्यालयले पहल गरिदिन वारम्वार जिज्ञासा राख्ने गरको बताए । उनले अगाडि भने हाम्रो कार्यालयमा गुनासाहरु सुन्न तथा समाधानका लागि हाम्रो जनशक्ति र पूर्वाधार तयार छ । यदि दूताबासका कार्यक्षेत्रका केही अधिकार वाणिज्यदूत कार्यालयलाई दिएमा हामी प्रभावकारी ढंगबाट काम गर्न सक्षम रहेको बताए । 
 । केही समय अगाडिदेखि वाणिज्यदूतको कार्यालय सञ्चालनमा आएपनि नयाँ राजदूत आएको अवसर पारेर कार्यालयको उद्घघाटन गरिएको हो । नेपाल फेष्टिभलको भोली पल्ट उद्घाटन कार्यक्रम राखिएकाले मेलबर्न वाहेक अन्य स्टेटका नेपाली समूदायका अगुवाहरुको  पनि उल्लेख्य उपस्थित थियो । उक्त अवसरमा अष्ट्रेलियन अफ दि ईयर एवार्ड प्राप्त ऐश्वर्य कंशाकारलाई सम्मान गरिएको थियो ।

कार्यक्रममा बोल्दै पूर्व एनआरएनका अध्यक्ष  एवं एनआरएन आईसीसीको उच्चस्तरीय समितिका संयोजक शेष घले, एनआरएन अष्ट्रेलियाका अध्यक्ष अनिल पोखरेल, नेप्लीज एशोसिएसन अफ भिक्टोरियाका अध्यक्ष डा. एकिन्द्र तिमल्सिना, एनआरएन भिक्टोरियाका उपसंयोजक महादेव धानुक, दिदीबहिनी समाज भिक्टोरियाकी अध्यक्ष रोशनी श्रेष्ठ, नारी निकुञ्ज भिक्टोरिया संयोजक राशीसिंह ठकुरी, अष्ट्रेलियन नेप्लीज मल्टिकल्चरल सेन्टरका अध्यक्ष डा.तिलक पोखरेल, फेडरेसन अफ नेप्लीज अर्गनाईजेसन्स ईन अष्ट्रेलिया फेन्काका अध्यक्ष बम योन्जन लगायतले सो अवसरमा शुभकामना दिएका थिए ।