प्रवासी नेपाली मञ्च अष्ट्रेलियाको अधिवेशन अगस्ट १६ सिड्नीमा हुने

सिड्नी ।  प्रवासी नेपाली मञ्च (ओएनएफ) अष्ट्रेलियाको छैटौं राष्ट्रिय अधिवेशन आगामी अगस्ट १६ मा सिड्नीमा हुने भएको छ।

अधिवेशन अबर्नस्थित ग्रान्ड फंक्शन सेन्टर, पारामाटा रोडमा आयोजना हुनेछ। आयोजकका अनुसार बिहान उद्घाटनसहित बन्दसत्र सञ्चालन हुनेछ भने साँझ ५ बजे समापन तथा नयाँ नेतृत्व घोषणा कार्यक्रम हुनेछ।

मञ्चका प्रचार विभाग प्रमुख अशिम कोइरालाका अनुसार अधिवेशनमा पाँचौं अधिवेशनयता संगठनले गरेका गतिविधि तथा कामको समीक्षा गरिनेछ। साथै आगामी तीन वर्षका लागि संगठनको कार्यदिशा र योजना तय गर्दै नयाँ नेतृत्व चयन गरिनेछ।

अधिवेशनका लागि आवश्यक तयारी अघि बढाउन विभिन्न समितिहरू गठन गरिएको र ती समितिले जिम्मेवारीअनुसार काम गरिरहेको कोइरालाले बताए।

अधिवेशनमा अष्ट्रेलियाका आठवटै राज्य तथा क्षेत्रबाट प्रतिनिधि र पर्यवेक्षक सहभागी हुनेछन्। समापन कार्यक्रममा प्रवासी नेपाली मञ्चको अन्तर्राष्ट्रिय तथा ओशियाना कमिटीका प्रतिनिधिका साथै अष्ट्रेलियामा रहेका विभिन्न नेपाली संघसंस्थाका अगुवाको पनि सहभागिता रहने आयोजकले जनाएको छ।

नयाँ नेतृत्व चयनसँगै अधिवेशनले आगामी कार्यकालका लागि संगठनको प्राथमिकता र कार्यक्रमसमेत तय गर्ने बताइएको छ।