सिड्नीमा ‘बादलमुनि बागलुङ’ माथि विशेष साहित्यिक बहस

सिड्नी।  सिड्नीको रकडेलस्थित इन्द्रेणी फङ्सन सेन्टरमा शनिबार लेखक तथा पर्यटन व्यवसायी भिम न्यौपानेको आत्मकथात्मक कृति ‘बादलमुनि बागलुङ’ माथि विशेष पुस्तक विमर्श कार्यक्रम सम्पन्न भएको छ। अन्तर्राष्ट्रिय नेपाली साहित्य समाज (इन्स) एनएसडब्लु च्याप्टरको आयोजनामा तथा बागलुङ समाज अष्ट्रेलियाको सहकार्यमा सम्पन्न भएको हो। कार्यक्रममा साहित्यप्रेमी, सञ्चारकर्मी तथा नेपाली समुदायका उल्लेख्य व्यक्तिहरूको सहभागिता रहेको थियो।

हालै साहित्यपोस्ट गैरआख्यान पुरस्कार २०८२ को लङलिस्टमा परेको उक्त कृतिबारे पत्रकार ऋषि आचार्यले सहजीकरण गरेका   थिए ।  छलफलमा विष्णु हमाल, राज खनाल र वीरेन्द्र मल्लले  पुस्तकको साहित्यिक गहिराइ, आत्मीय प्रस्तुति र सामाजिक सन्देशबारे धारणा राखेका थिए।

इन्स एनएसडब्लुकी अध्यक्ष भावना पराजुलीले लेखक न्यौपानेलाई बधाई दिँदै पुस्तकले प्रवासमा नेपाली साहित्यलाई थप उचाइ दिने विश्वास व्यक्त गरिन्। कार्यक्रममा डिला खरेल , सौरभ किरण, सुरेन्द्र दवाडी, चतुर्भुज खरेल, निर्देशक आशिष भेटवाल तथा डा. राजु मानन्धरलगायतले लेखकसँग अन्तरक्रिया गरेका थिए।

साहित्यप्रेमीहरूले ‘बादलमुनि बागलुङ’ लाई इमानदार अनुभूति, जीवन संघर्ष र प्रेरणादायी कथाले भरिएको पठनीय कृतिका रूपमा प्रशंसा गरेका थिए। कार्यक्रमले अष्ट्रेलियामा नेपाली साहित्यिक गतिविधि र समुदायबीचको सांस्कृतिक सम्बन्धलाई थप मजबुत बनाएको सहभागीहरूको भनाइ थियो।