नेपलिज कम्युनिटी अफ न्यूक्यासल (NCON) को नयाँ कार्यसमिति सर्वसम्मत चयन

सिड्नी। न्यूक्यासलमा रहेको नेपाली समुदायको साझा संस्था नेपलिज कम्युनिटी अफ न्यूक्यासल (NCON) को नयाँ कार्यसमिति सर्वसम्मत रूपमा चयन गरिएको छ। नवगठित कार्यसमितिको अध्यक्षमा भवेश भट्टराई चयन भएका छन्।

कार्यसमितिका अन्य पदाधिकारीहरूमा उपाध्यक्ष दिपेश अर्याल, सचिव सपना बनियाँ राई, कोषाध्यक्ष सुदुर्लभ पण्डित, सह–सचिव सुजन जिसी र सह–कोषाध्यक्ष शैलेश सुबेदी रहेका छन्। त्यस्तै, सदस्यहरूमा कमल खत्री, कल्पना गैरे र आशुतोष नेपाल चयन भएका छन्।

अध्यक्ष भट्टराईले विगत चार वर्षदेखि समुदाय सेवामा सक्रिय रूपमा संलग्न रहने अवसर पाएको स्मरण गर्दै नयाँ जिम्मेवारीप्रति कृतज्ञता व्यक्त गरेका छन्। उनले पूर्व अध्यक्ष वीरबहादुर राईसहित पूर्व कार्यसमितिका प्रतिबद्ध र कर्मठ सदस्यहरूले संस्थाको प्रतिष्ठा, प्रगति र सद्भाव अभिवृद्धिमा पुर्‍याएको योगदानको प्रशंसा गर्दै आगामी दिनमा संस्थाको सुदृढ आधारलाई अझ मजबुत बनाउने प्रतिबद्धता जनाएका छन्।