फेवा फुटलब क्लबले जित्यो एनआरएन कप फुटबलको उपाधि 

सिड्नी । एनआरएनए युथ फोरमको आयोजनामा  एन्फा अष्ट्रेलिया र गोर्खा नेप्लीज कम्युनिटीको सहकार्यमा हालै सिड्नीमा सम्पन्न एनआरएन कप फुटबलको उपाधि फेवा फुटलब क्लबले जितेको छ ।  प्रतिस्पर्धात्मक फाईनल खेलमा सेन्टजर्ज नेप्लीज फुटबल क्लबलाई टाईब्रेकरमा पाँचका विरुद्ध ६ गोलले फेवाले सो उपाधि जितेको हो ।

 उपाधिसँगै फेवा फुटबल क्लबले ४ हजार डलर सहित ट्रफी प्राप्त गरेको छ । त्यसैगरी उपविजेता सेन्टजर्ज नेप्लीज फुटबल क्लबले २ हजार डलर र ट्रफी हात पार्यो । १ सय ४४ खेलाडी सम्मिलित २४ टिमको सहभागिता रहेको सो प्रतियोगिताका विजयी टिम र उत्कृस्ट खेलाडीहरुलाई एनआरएनए अष्ट्रेलियाका अध्यक्ष अनिल पोखरेलले पुरस्कार र प्रमाणपत्र प्रदान गरे । 

कार्यक्रममा बोल्दै अध्यक्ष पोखरेलले समुदायमा आपसी भाइचारा ,सद्भाव र आत्मियताको बिकास गर्न खेलकुदका गतिविधिले महत्वपूर्ण भूमिका खेल्ने बताउदै नेपाली समुदायमा यस्ता प्रतियोगिताहरुलाई एनआरएनए अष्ट्रेलियाले आगामी दिनमा पनि निरन्तरता दिने उल्लेख गरे ।

कार्यक्रममा प्रतियोगिताका मुख्य प्रायोजक फोर नेशन्स ईन्टरनेशनलका निर्देशक तथा एक्काका  अध्यक्ष कोमलराज  पाठक , युथ फोरमका संयोजक सुमन बोहरा, गोर्खा नेप्लीज कम्युनिटीका अध्यक्ष राजीव प्रधान, सिड्नीमा रहेका खेलाकुदप्रेमीहरु एबं विभिन्न संघ सस्थाका प्रतिनिधिहरुको सहभागिता रहेको थियो ।