४७औँ राष्ट्रपति पदमा डोनाल्ड ट्रम्पद्वारा शपथ

काठमाडौं । रिपब्लिकन पार्टीका डोनाल्ड ट्रम्प अमेरिकाको ४७औँ राष्ट्रपति  बनेका छन् ।  अमेरिकामा गत नोभेम्बर ५ मा भएको राष्ट्रपतीय चुनावमा निर्वाचित डोनाल्ड ट्रम्पले पद तथा गोपनीयताको शपथ लिएका छन् । ट्रम्पले 'म यो कुराको गम्भीरतापूर्वक शपथ लिन्छु कि म संयुक्त राज्य अमेरिकाको राष्ट्रपतिको पदलाई निष्ठापूर्वक निर्वाह गर्ने छु र आफ्नो पूर्ण क्षमताअनुसार अमेरिकाको संविधानको संरक्षण, बचाउ र रक्षा गर्ने छु' भन्ने वाक्यांश वाचन गरेसँगै औपचारिक रूपमा अमेरिकाको ४७ औं राष्ट्रपति बनेका हुन् ।

ट्रम्पले न्याय विभागको अनुचित र भेदभावपूर्ण प्रयोगको अन्त्य गरिने बताए। उनले अमेरिकाको सार्वभौमसत्ता र सुरक्षा पुनर्स्थापित हुनेछ उल्लेख गर्दै न्यायको सन्तुलन पनि पुनर्स्थापित हुने बताए । उनले भने, ‘‘हाम्रो सर्वोच्च प्राथमिकता स्वाभिमान, समृद्धि र स्वतन्त्रताले भरिपूर्ण मुलुक निर्माण गर्ने हो ।’’डोनाल्ड ट्रम्पले राष्ट्रपति बनेपछि आफ्नो योजनाबारे जानकारी दिएका छन् । उनले आज अमेरिका–मेक्सिको सीमामा राष्ट्रिय संकटकाल घोषणा गर्ने कार्यकारी आदेशमा हस्ताक्षर गर्ने बताए ।

ट्रम्पलाई प्रधानन्यायाधीश जोन रोबर्ट्सले राजधानी वासिङ्टन डिसीस्थित संसद् भवन युएस क्यापिटल हिलको रोटुण्डा भवनमा आयोजित विशेष समारोहमा सपथ गराएका हुन् । 
शपथ समारोहमा अमेरिका पूर्व राष्ट्रपति जो बाइडेन, बाराक ओबामा, जर्ज बुसलगायत अन्य नेताहरू पनि देखिएका थिए ।  कार्यक्रममा विभिन्न देशका राष्ट्राध्यक्ष र ठूला नेता सहभागी भए । जसमा भारतका तर्फबाट विदेशमन्त्री एस. जयशंकरले प्रतिनिधित्व गरेका थिए ।  राजनीतिक नेताहरूसँगै हलिउड उद्योग र टेक्नोलोजी जगतका थुप्रै चर्चित व्यक्तिहरू पनि कार्यक्रममा सहभागी भए। यसका अलावा, बक्सर जेक पाउल र उनका दाजु लोगन पाउलपनि उस्थित थिए । मेटाका सीईओ मार्क जकरबर्ग, अमेजनका सीईओ जेफ बेजोस, गुगलका सीईओ सुन्दर पिचाई र टेस्लाका सीईओ एलन मस्क पनि कार्यक्रममा सहभागी भएका थिए। यी सबै सोमबार वाशिंगटन डीसीस्थित क्यापिटल रोटुन्डामा डोनाल्ड ट्रम्पको शपथ समारोहमा उपस्थित भएका थिए।

सामान्यत: शपथ ग्रहण समारोह क्यापिटलको बाहिर हुने गरेको भएपनि यसपटक अत्यधिक चिसोका कारण भवनभित्र गरिएको हो । यसअघि सन् १९८५ मा रोनाल्ड रेगनको शपथ ग्रहण समारोह क्यापिटल हिलभित्र आयोजना गरिएको थियो

यसअघि ट्रम्प सन् २०१७ देखि २०२१ सम्म अमेरिकाको राष्ट्रपति थिए । २०१६ को चुनावमा डेमोक्रेटिक पार्टीकी उम्मेदवार हिलारी क्लिन्टनलाई हराएका ट्रम्प सन् २०२० मा जो बाइडेनसँग पराजित भएका थिए ।