सुशीला कार्की अन्तरिम प्रधानमन्त्री नियुक्त, ६ महिनाभित्र निर्वाचन गर्ने तयारी

काठमाडौं । जेनजी आन्दोलनको दबाब र युवापुस्ताको आकांक्षालाई सम्बोधन गर्दै नेपालकी पूर्वमुख्य न्यायाधीश सुशीला कार्की अन्तरिम प्रधानमन्त्रीमा नियुक्त भएकी छन्। शनिबार शीतल निवासमा आयोजित समारोहमा राष्ट्रपति रामचन्द्र पौडेलले उनलाई पद तथा गोपनीयताको शपथ गराए।

राष्ट्रपतिको कार्यालयद्वारा जारी विज्ञप्तिअनुसार मुलुकमा उत्पन्न असाधारण राजनीतिक परिस्थितिलाई सम्बोधन गर्ने उद्देश्यले संविधानको पालना, संरक्षण तथा राष्ट्रिय एकताको प्रवर्द्धनका लागि राष्ट्रपतिले नेपालको संविधानद्वारा प्रदत्त विशेष अधिकार प्रयोग गर्दै कार्कीलाई अन्तरिम प्रधानमन्त्रीमा नियुक्त गरेका हुन्। सो व्यवस्था अनुसार आगामी ६ महिनाभित्र प्रतिनिधिसभा निर्वाचन सम्पन्न गर्नुपर्नेछ।

सुशीला कार्कीको पृष्ठभूमि

सुशीला कार्की नेपालको इतिहासमै पहिलो महिला मुख्य न्यायाधीश हुन्। उनले २०७३ सालमा सर्वोच्च अदालतको नेतृत्व गर्दै न्यायपालिकामा पारदर्शिता, सुशासन र भ्रष्टाचारविरुद्ध कठोर अडानका कारण व्यापक ख्याति कमाएकी थिइन्।
नेपाल वकिल परिषद् तथा त्रिभुवन विश्वविद्यालयमा अध्यापन अनुभव भएकी कार्की मानवअधिकार, महिला अधिकार र न्यायिक सुधारका क्षेत्रमा सक्रिय रहिएकी थिइन्। कानुन र लोकतान्त्रिक मूल्यप्रति दृढ अडान राख्ने व्यक्तित्वका रूपमा उनी चिनिन्छिन्।

न्यायपालिकामा निष्पक्षता र निडरताका कारण चर्चामा रहेकी कार्की अब कार्यपालिका नेतृत्व गर्दै मुलुकलाई निर्वाचन र राजनीतिक स्थिरतासम्म पुर्‍याउने चुनौतीपूर्ण जिम्मेवारीमा आएकी छन्।