नयाँ गीत ‘फूल फुल्यो केशरी’ लिएर आउँदै जेनिशा गौतम

सिड्नी।  अस्ट्रेलियालाई कर्मथलो बनाउँदै नेपाली सांगीतिक क्षेत्रमा निरन्तर सक्रिय रहँदै पछिल्लो समय नेपाली सांगीतिक क्षेत्रमा फरक शैली र मौलिक प्रस्तुतिका कारण चर्चामा रहेकी गायिका तथा सर्जक जेनिशा गौतमले  नयाँ गीत ‘फूल फुल्यो केशरी’ लिएर आउने तयारीमा छिन् ।

लोक तथा आधुनिक संगीतको मिश्रणमा तयार गरिएको गीतमा प्रताप दास र जेनिशा गौतमको स्वर रहेको छ । गीतका शब्द तथा संगीत पनि जेनिशा स्वयंले सिर्जना गरेकी हुन्। यसअघि ‘सुटुक्कै, माया गरिदेउ, गाजल जस्ता गीतमार्फत दर्शकमाझ पहिचान बनाएकी जेनिशाले नयाँ गीतमा पनि भावनात्मक तथा सांस्कृतिक स्वाद प्रस्तुत गर्ने प्रयास गरेकी छन्।

सार्वजनिक पोस्टरमा हिमाली दृश्य, फूलले सजिएको परिवेश र कलाकारहरूको आकर्षक प्रस्तुति देख्न सकिन्छ । यसले गीत प्रेम, सम्झना र नेपाली मौलिकतासँग जोडिएको कथामा आधारित रहेको संकेत गर्छ। गीतमा  जेनिशा गौतमसँगै दीपेन भण्डारीको अभिनय देख्न सकिन्छ।

गीतको संगीत निर्माण उदय राज पौडेलले गरेका छन् भने मिक्सिङ तथा मास्टरिङ कुमार थापाले गरेका हुन् । छायांकन ओम गोर्खालीले गरेका छन् भने सम्पादन टेकेन्द्र शाहले गरेका छन्। पोस्ट प्रोडक्सन लाइमलाइट नेपालले गरेको छ।

भिडियोलाई जेनिशा गौतमले नै निर्देशन तथा कोरियोग्राफी गरेकी हुन् । जेनिशा इन्टरटेन्मेन्टले गीतलाई  जुन ६ तारिक  शनिबार  सिड्नीबाट  सार्वजनिक गरिने जनाएको छ। नेपाली संगीत क्षेत्रमा पछिल्लो पुस्ताको सिर्जनात्मक प्रयासका रूपमा ‘फूल फुल्यो केशरी’ लाई चासोका साथ हेरिएको छ।