टिका कार्की – जसले स्मृतिको टिका लाइदिएर गए


  • March 15, 2021


टिका कार्की – जसले स्मृतिको टिका लाइदिएर गए

माधव गैह्रे

टिका कार्की अस्ट्रेलियाको नेपाली समुदायमाझ चिरपरिचित नाम । करिब दुई दशकदेखि हिमालयन रेडियो मार्फत यहाको नेपाली समाजलाई समाचार ,सुचना र मनोरंजन का सामाग्री पस्किएर समाजलाई सुसुचित बनाउदै आएका टिका कार्की कहिलै नफर्कने गरी यहि मार्च १ तारिख सोमबारका दिन यो धर्तीबाट सदाका लागी अस्ताए । सुनौलो भबिस्यको सपना बुनेर सन् १९९५ तीर अस्ट्रेलिया आएका टिकाले यहाको नेपाली समाजमा सम्झनलायक धेरै सम्झनाका कोशेली हामीलाई नासोको रुपमा छोडेर आफु भने सिलबन्दी बाकसमा नेपालमा फर्किदै छन् । डाडाको घाम जस्तै अस्ताउन लागेका बृद्ध बा ,आमा अनि जीवनभर नछुट्टिने कसम खाएर सम्बन्ध गासेकी जीवन संगिनी अनि तिमीले नेपाल छोड्दा तोतॆ बोलि बोल्दै आगन र पिडिमा तिरितिरी गर्दै हिडेका दुई छोराहरुको याद अनि सम्झनालाई आफ्नो हृदयको कुनामा सजाएर तिमि यति चाडो जान्छौ भन्ने कसैले पनि कल्पना गरेको थिएन ।

तिमि आयौ अनि तिमि गयौ ,जन्मपछि मृत्यु हुन्छ भन्ने जान्दाजान्दै पनि मान्छे कसै कसैको मृत्युमा किन यति बिघ्न दुखि हुन्छ ? समाज किन निरास बन्छ ? हो जसले समाजका लागी केहि दिएको हुन्छ त्यसलाई समाजले अनन्त काल सम्म सम्झी रहन्छ । तिमीले आफुलाई यहि कोटिमा उभ्याएका छौ र त हामीले र यहाको नेपाली समाजले जनमजनम सम्झिरहने छ । पत्रकारिता त्यो पनि प्रबासमा यो क्षेत्रमा लागेका भुक्तभोगीलाई मात्र थाहा अनि अनुभव हुन्छ ,कति कठिन र चुनौती थिए र अझै छ भन्ने कुरोको चुरो । हिमालयन रेडियो मार्फत तिमीले गरेको पत्रकारितालाई कसैले बिर्सन्छु भन्दा पनि बिर्सन सक्दैन । आफ्नो कठिन अनि चुनौतीका दिनहरुलाई पाखा पार्दै तिमीले रेडियोलाई दिएको निरन्तरता बास्तवमै उत्कृस्ट थियो । यहाको नेपाली समाजको एक मात्र सामुदायिक रेडियो हिमालयन रेडियो तिमि अस्ताए सगै अस्ताउने त होइन भन्ने सबाल उठेको छ । टिका जी को आत्मालाई शान्ती दिलाउने नै हो भने हाम्रो समाजले हिमालयन रेडियोलाई मर्न दिनु हुदैन । यसतर्फ सबैको ध्यान जानु पर्ने देखिन्छ । टिका कार्की जसले भोलेन्टियरको रुपमा दुई दशक भन्दा लामो समय हिमालयन रेडियोको श्रीवृद्धिमा लगायो । दुईदुई दशक यहाको नेपाली समुदायलाई सुसुचित पार्न लागिपरेको तिमीले आफ्नो अन्तिम यात्राको त तय गर्यौ , अरुको मृत्युको खबर लेखेर रेडियो मार्फत जानकारी दिने साथीको मृत्युको खबर लेख्नु पर्दा यी हातका औलाहरु कापिरहेका छन् । अरुको मृत्युको खबर लेख्ने र पढ्ने पत्रकार / संचारकर्मी आफ्नै मृत्युको बारेमा बेखबर बन्नु पर्ने बास्तबिकतालाई कसैले नकार्न सक्दैन । भौतिक रुपले मरे पनि धेरैको हृदयमा बाचिरहेका मेरो साथि टिका प्रति हार्दिक श्रदान्जली ।


सम्बन्धित समाचारहरु