भारतीय नाकाबन्दीको अस्ट्रेलियाभरि व्यापक विरोध प्रर्दशन (फोटो झलक सहित)

सिड्नी । गैर आवासिय नेपाली संघ (एनआरएन) अस्ट्रेलियाले भारतीय नाकाबन्दीको विरोधमा अष्ट्रेलियाका पाँचवटा मुख्य शहरमा शुक्रबार ( नोभेम्बर २० तारिक) एकैसाथ प्रर्दशन गरेको छ ।
अष्ट्रेलियाको प्रमुख शहर सिड्नी, ब्रिसबेन, मेलबर्न ,डार्विन र एडिलेडमा प्रवासी नेपालीहरुले भारतिय रवैयाको खुलेर विरोध गरेका प्रर्दशन गरेका छन । अस्ट्रेलियाका यी प्रमुख शहरहरुमा सयौको संख्यामा उपस्थीत नेपालीहरु प्लेकार्ड र नारा सहित बिरोध प्रर्दशनमा उत्रिएका थिए ।
४२ डिग्री तापक्रमको तातोलाई परबाह नगरी सिड्नीको मार्टिन प्लेसमा उपस्थीत नेपालीहरुले ब्यापक विरोध प्रर्दशन गर्दै तत्काल नाकाबन्दी हटाउन र नेपालमाथिको हस्तक्षेप बन्द गर्न आग्रह गरेका थिए । करिब पाँच सयको संख्यामा उपस्थित भिड्ले सिड्नीको मुटु मानिने मार्टीन प्लेसमा करिब डेढ घन्टा धर्ना र विरोध प्रर्दशन गरेको थियो । यसको प्रमुख उद्देस्य भनेको अन्तराष्ट्रिय रुपमा भारतविरुद्ध दबाब श्रृजना गर्नु हो ,एनआरएन अस्ट्रेलियाका अध्यक्ष सुरेन्द्र सिग्देलले बताए । सिग्देलले एनआरएनएको यो विरोधको पहिलो कार्यक्रम रहेको र अघोषित नाकाबन्दी नहटे अझै लामो विरोध कार्यक्रम चल्ने बताए ।
मोदी भूपरीवेष्ठित मुलुकको अधिकारको सम्मान गर, नेपालमाथिको अमानवीय, गैरकानुनी र गैरन्यायिक नाकाबन्दी बन्द गर।जस्ता प्लेकार्ड लिएर नेपालीहरु प्रर्दशनमा सहभागी भएका थिए । यो एनआरएन अष्ट्रेलियाले दबाबस्वरुप पहिलो चरण बिरोध प्रर्दशन रहेको र दोस्रो चरणमा भारतीय राजदुतावास लगायत सम्बन्धित अन्य कुटनैतिक नियोग र निकायहरुमा बिरोध पत्र बुझाउने कार्यक्रम रहेको एनआरएन न्यु साउथवेल्सका उप संयोजक प्रकाश खरेलले नेपाल न्युज अस्ट्रेलियालाई बताए ।
विरोधलाई प्रभावकारी पार्न र अन्तराष्ट्र्रीय दबाब श्रृजना गर्न एनआरएनले अस्ट्रेलियन सरकारको विदेश मन्त्रालय र अस्ट्रेलियाको विभिन्न राजनैतिक संस्थाहरुलाई अघोषित नाकाबन्दीको जानकारी दिदै ध्यानाकार्षण पत्र बुझाउने खरेलले जानकारी दिए ।
अन्तमा संयुक्त राष्ट्र संघको नियोग, एम्नेस्टी इन्टरनेसनल, रेडक्रस लगायतका विभिन्न संस्थाहरुलाई भारतले नेपाल बिरुद्ध गरेको नाकाबन्दीको जानकारी दिदै ध्यानाकार्षण पत्र बुझाउने समेत कार्यक्रम रहेको एनएसडब्लुका सचिब भुपाल सिटौलाले बताए ।