भारतीय प्रधानमन्त्री मोदीसँग अर्थमन्त्री महतको भेट


  • June 12, 2015


भारतीय प्रधानमन्त्री मोदीसँग अर्थमन्त्री महतको भेट

काठमाडौँ । भारतीय प्रधानमन्त्री नरेन्द्र मोदीले नेपालमा हुन गइरहेको अन्तर्राष्ट्रिय दाता सम्मेलनमा सकेसम्म समय मिलाएर भाग लिन आउने बताए । आज नयाँ दिल्लीस्थित आफ्नो कार्यकक्षमा दाता सम्मेलनमा सहभागी भइदिन अर्थमन्त्री डा रामशरण महतले नेपाल सरकारका तर्फबाट हस्तान्तरण गरेको निमन्त्रणापत्र स्वीकार गर्दै भारतीय प्रधानमन्त्री मोदीले सो कुरा बताए । सो अवसरमा प्रधानमन्त्री मोदीले पुनःनिर्माणको काममा भारत नेपाललाई जस्तोसुकै सहयोग गर्न तयार रहेको पनि बताए । ‘नेपालमा हुन लागेको अन्तर्राष्ट्रिय दाता सम्मेलनमा सकेसम्म समय मिलाएर आउनेछु र पुनःनिर्माणको लागि नेपाललाई भारत जस्तोसुकै सहयोग गर्न पनि तयार छ,’ प्रधानमन्त्री मोदीको भनाइ उद्धृत गर्दै अर्थमन्त्री डा महतले रासससँग भने । अर्थमन्त्री डा महतले भारतीय प्रधानमन्त्रीसँगको भेट अत्यन्त सकारात्मक र सौहार्दपूर्ण वातावरणमा सम्पन्न भएको जानकारी दिनुभयो ।

अर्थमन्त्री डा महतका अनुसार प्रधानमन्त्री मोदीसँग दुई देशको आर्थिक मुद्दा र भूकम्पपछि नेपालको पुनःनिर्माण अभियानबारे छलफल भएको थियो । अर्थमन्त्री डा महतले विपद्को अवस्थामा भारतीय जनता र भारतीय सरकारले पुर्याएको सहयोगप्रति आभार व्यक्त गरेका थिए । अर्थमन्त्री डा महतले भारतले विकट स्थानमा पुगेर हेलिकप्टरबाट भूकम्पपीडितको उद्धारमा ठूलो सहयोग पुर्याएको गरेको प्रसङ्गसमेत उल्लेख गर्नुभएको थियो । ‘पुनःनिर्माणको समयमा पनि भारतीय जनता र भारतको सहयोग जरुरी रहेकाले त्यसमा सहयोग गर्न मैले नेपालका तर्फबाट आग्रह गरेँ,’ अर्थमन्त्री डा महतले भने । भारतका लागि नेपाली राजदूत दीपकुमार उपाध्यायले प्रधानमन्त्री मोदी र अर्थमन्त्री डा महतबीचको भेट अत्यन्त सकारात्मक र उत्साहवद्र्धक भएको प्रतिक्रिया दिए ।


NEPAL NEWS Team
306 views

सम्बन्धित समाचारहरु