Wednesday, June 12, 2024

प्रधानमन्त्री कोइराला र चीनियाँ राजदूतबीच भेट


  • May 10, 2015


प्रधानमन्त्री कोइराला र चीनियाँ राजदूतबीच भेट

काठमाडौँं । प्रधानमन्त्री सुशील कोइरालासँग नेपालका लागि चीनका राजदूत वु चुन्ताइका बीचमा प्रधानमन्त्री निवास बालुवाटारमा भेटवार्ता भएको छ । भेटका अवसरमा उहाँहरुबीच नेपालमा हालै आएको भूकम्पले गरेको क्षति, उद्धार र राहत कार्यको बारेमा कुराकानी भएको थियो । भेटमा प्रधानमन्त्री कोइरालाले नेपालले अकल्पनीय विपत्ति भोग्नुपरेको र यसबाट ठूलो जनधनको क्षति भएको बताएका थिए । सो अवसरमा राजदूत चुन्ताइले प्राकृतिक विपत्ति जहाँकहीँ पनि आउन सक्ने बताउँदै उद्धार र राहतमा नेपालले छरछिमेकी र मित्रराष्ट्रको सहयोग लिएर गरेको कामको सराहना गरेका थिए । उनले नेपाल सरकारको अनुरोधमा चीनले पनि उद्धार र राहत कार्यमा सघाउन पाएकामा खुसी व्यक्त गरेका थिए । सो अवसरमा राजदूत चुन्ताइले प्रधानमन्त्री कोइराला समक्ष उद्धारका लागि खटिएर आएका चीनियाँ विज्ञले गरेको उद्धार कार्यको जानकारी गराएका थिए । साथै, उनले चीनले भूकम्पबाट अवरुद्ध अरनिको राजमार्गको ४८ किलोमिटर खण्ड पहिरो हटाएर सुचारु गरिएको जानकारी दिएका थिए । राजदूत चुन्ताईले आवश्यक परेमा थप सहयोग गर्न पनि आफ्नो सरकार तयार रहेको बताउँदै चीनले भूकम्पपीडितका लागि दिने राहत सामग्री आइरहेको उल्लेख गरेका थिए । सो अवसरमा प्रधानमन्त्री कोइरालाले नेपाललाई परेको दुःखमा आवश्यक सहयोग गरेकोमा आफू र नेपाल सरकारको तर्फबाट चीन सरकारलाई धन्यवाद दिएका थिए ।


NEPAL NEWS Team
256 views

सम्बन्धित समाचारहरु