संविधानसभाबाट भागेका हैनौँ, ज्यान जोगाउन खोजेका हौँः भट्टराई

बुटवल । एकीकृत नेकपा माओवादीका वरिष्ठ नेता डा. बाबुराम भट्टराईले एमाओवादीले संविधानसभा नछोडेको स्पष्ट पारेका छन्। ‘हामी संविधानसभा छोडेर भागेका छैनौं। संविधानसभा हामी आफैंले बनाएका हौं। आफैंले बनाएको हतियार कसैले खोसेर आफैंविरुद्ध दुरुपयोग हुन लाग्यो भने ज्यान जोगाउनुपर्छ कि पर्दैन ? उनले प्रश्न गरे। पश्चिम कमाण्ड अन्र्तगत अगुवा कार्यकर्ताहरुलाई वैचारिक-राजनीतिक प्रशिक्षणका लागि बुटवल पुगेका एमाओवादी नेता भट्टराईले पत्रकार भेटघाटका क्रममा भने ‘हामी अहिले यथास्थितिवादी-प्रतिगामी शक्तिहरुबाट अपहरित संविधानसभा उत्पीडित वर्गको हातमा फर्काउन शक्ति आर्जनका लागि जनतामाझ आएका हौं ।’
नेता भट्टराईले अहिलेको समस्याको मूल जड एमाले भएको पनि बताए। एमालेले निर्वाचनका बेला जनतासामु गरेको बाचा र अडानलाई छोडेर कांग्रेसको एजेण्डामा आफूलाई सहबरण गर्दा समस्या उत्पन्न भएको उनको स्पष्टोक्ति थियो। कांग्रेससँग मिलेर अघि सारेको ९ बुँदे प्रस्तावमा एमालेले निर्वाचनका बेला उठाएको प्रत्यक्ष निर्वाचित कार्यकारी प्रधानमन्त्री, बहुपहिचानमा आधारित संघीयता, मिश्रित निर्वाचन प्रणाली सबै छोडेर पुरानै संसदीय उदारवादी लोकतन्त्रमा आधारित संसदीय व्यवस्था, संघीयताका नाममा पहिचानविहिन प्रशासकीय बाँडफाँड, पहिलो हुने निर्वाचन प्रणाली स्वीकार गर्दा नै अहिलेको समस्या उत्पन्न भएको उनले बताए।

नियम, विधि अभ्यास सबै मिचेर जबर्जस्ती माघ ११ गते कांग्रेस–एमालेबाट अघि बढाइएको मतदानको प्रक्रिया स्थगित नगरेसम्म सार्थक वार्ता हुन नसक्ने बताउ“दै उनले सत्तापक्षीले नै वार्ताको वातावरण निर्माण गर्नुपर्ने बताए। माघ ८ अघि नै आफूहरु संवाद र सहमतिका आधारमा समस्या सुल्झाउन तयार भएको भए पनि सत्तापक्षी दलहरुले नै वार्तामा नबस्ने निर्णय गर्दा अहिलेको समस्या उत्पन्न भएको उनले बताए। राज्यसत्ताको चरित्र निर्धारण गर्ने मुख्य विषयमा प्रमुख दलहरुबीच सहमतिकै आधारमा संविधान जारी हुनुपर्ने कुरा दोहोर्‍याउँदै नेता भट्टराईले मतदानको प्रक्रिया रोकिए फेरि दलहरुबीच संवादको प्रक्रिया अघि बढ्ने बताए।